C.M. Trophy – sports Prize Distribution

செ.வெ.எண்:-69/2024

நாள்:-28.09.2024

திண்டுக்கல் மாவட்டம்

முதலமைச்சர் கோப்பைக்கான மாவட்ட அளவிலான விளையாட்டுப் போட்டிகளில் முதல் 3 இடங்களில் வெற்றி பெற்ற 708 வீரர், வீராங்கனைகளுக்கு ரூ.51.24 இலட்சம் மதிப்பிலான பரிசுத் தொகை மற்றும் பாராட்டுச் சான்றிதழ்களை மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் வழங்கினார்.

திண்டுக்கல் மாவட்ட விளையாட்டு மைதானத்தில், முதலமைச்சர் கோப்பைக்கான மாவட்ட அளவிலான விளையாட்டுப் போட்டிகளில் வெற்றி பெற்ற வீரர், வீராங்கனைகளுக்கு மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள், திண்டுக்கல் பாராளுமன்ற உறுப்பினர் திரு.ஆர்.சச்சிதானந்தம் மற்றும் திண்டுக்கல் மாநகராட்சி வணக்கத்திற்குரிய மேயர் திருமதி இளமதி ஜோதிபிரகாஷ் ஆகியோர் முன்னிலையில் இன்று(28.09.2024) பரிசுகள் மற்றும் பாராட்டு சான்றிதழ்களை வழங்கினார்.

இந்நிகழ்ச்சியில் மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் தெரிவித்ததாவது:-

மாண்புமிகு தமிழ்நாடு முதலமைச்சர் அவர்கள், கல்விக்கு மட்டும் மல்லாமல் விளையாட்டிற்கும் முக்கியத்துவம் அளித்து, மாணவ, மாணவிகள், இளைஞர்களின் விளையாட்டுத் திறனை ஊக்குவித்திடும் வகையில் விளையாட்டுத் துறைகளில் பல்வேறு சிறப்புத் திட்டங்களை தொடர்ந்து செயல்படுத்தி வருகிறார்கள். தமிழ்நாட்டில் பல்வேறு சர்வதேச மற்றும் தேசிய அளவிலான விளையாட்டுப் போட்டிகள் நடைபெற்று வருகிறது. இதன், மூலம், தமிழ்நாட்டில் இளைஞர்கள் மற்றும் மாணவ, மாணவியர்கள் பெருமளவில் விளையாட்டுப் போட்டிகளில் பங்கேற்று சாதனை புரிந்து வருகிறார்கள்.

இளைய சமுதாயத்தினரின் அறிவு வளர்ச்சியை மட்டுமல்லாது அவர்களது உடல் வளர்ச்சி, மன வளர்ச்சி, உடல் நலம் ஆகியவற்றையும் பேணி பாதுகாக்க வேண்டியதன் அவசியத்தை கருத்தில் கொண்டு, கல்விக்கு அளிக்கும் முக்கியத்துவத்தை விளையாட்டிற்கும் அளிக்க வேண்டும் என்ற உயரிய நோக்கில், பல்வேறு திட்டங்களை தமிழக அரசு அறிவித்து செயல்படுத்தி வருகிறது.

மாண்புமிகு தமிழ்நாடு முதலமைச்சர் அவர்கள் ஆட்சி பொறுப்பேற்ற பின்பு செஸ் ஒலிம்பியாட் போட்டி மாமல்லபுரத்தில் நடத்தப்பட்டது. தொடர்ந்து கேலோ இந்தியா இளைஞர் விளையாட்டுப் போட்டிகள், முதலமைச்சர் கோப்பைக்கான விளையாட்டு போட்டிகள், பேரறிஞர் அண்ணா விரைவு சைக்கிள் போட்டிகள், பேரறிஞர் அண்ணா மராத்தான் போட்டிகள், அரசு ஊழியர்களுக்கான விளையாட்டுப் போட்டிகள், மாற்றுத்திறனாளிகளுக்கான விளையாட்டுப் போட்டிகள், நீச்சல் கற்பித்தல் பயிற்சி முகாம் மற்றும் கோடைகால பயிற்சி முகாம்கள் நடைபெற்று வருகிறது.

தமிழ்நாடு விளையாட்டு மேம்பாட்டு ஆணையம், இளைஞர் நலன் மற்றும் விளையாட்டு மேம்பாட்டுத்துறை சார்பில் முதலமைச்சர் கோப்பைக்கான திண்டுக்கல் மாவட்ட அளவிலான விளையாட்டுப் போட்டிகள்-2024, கடந்த 10.09.2024 அன்று தொடங்கி 24.09.2024 வரை நடத்தப்பட்டது.

பள்ளி, கல்லூரி மாணவ, மாணவிகள், பொதுமக்கள், அரசு ஊழியர்கள் மற்றும் மாற்றுத்திறனாளிகள் ஆகிய ஐந்து பிரிவுகளில் ஆண், பெண் இருபாலரும் பங்கேற்கும் வகையில் தடகளம், நீச்சல், கபாடி, கால்பந்து, கூடைப்பந்து, கையுந்துப்பந்து, கைப்பந்து , ஹாக்கி, கேரம், கிரிக்கெட், மேஜைப்பந்து, சதுரங்கம், சிலம்பம், கோ-கோ, இறகுப்பந்து என 42 வகையான விளையாட்டுப் போட்டிகள் மாவட்ட அளவில் நடத்தப்பட்டன. மொத்தம் 21,602 வீரர், வீராங்கனைகள் பல்வேறு போட்டிகளில் கலந்துகொள்வதற்காக தங்கள் பெயர்களை இணையதளம் வாயிலாக பதிவு செய்திருந்தனர். அதில் 11,606 பேர் போட்டிகளில் கலந்துகொண்டனர். அதில் முதல் 3 இடங்களில் வெற்றி பெற்றவர்கள் 708 வீரர், வீராங்கனைகள் ஆவர்.

தனிநபர் போட்டிகளில் வெற்றி பெற்றவர்களுக்கு முதல் பரிசாக ரூ.3,000, இரண்டாம் பரிசாக ரூ.2,000, மூன்றாம் பரிசாக ரூ.1,000, கூடைப்பந்து, கையுந்துப்பந்து, கோ-கோ, கபடி ஆகிய குழு போட்டிகளில் வெற்றி பெற்ற குழுக்களுக்கு முதல் பரிசாக ரூ.36,000, இரண்டாம் பரிசாக ரூ.24,000, மூன்றாம் பரிசாக ரூ.12,000, கால்பந்து மற்றும் ஹாக்கி போட்டிகளில் வெற்றி பெற்ற குழுக்களுக்கு முதல் பரிசாக ரூ.54,000, இரண்டாம் பரிசாக ரூ.36,000, மூன்றாம் பரிசாக ரூ.18,000, கைப்பந்து போட்டியில் வெற்றி பெற்ற குழுக்களுக்கு முதல் பரிசாக ரூ.42,000, இரண்டாம் பரிசாக ரூ.28,000, மூன்றாம் பரிசாக ரூ.14,000, கிரிக்கெட் போட்டியில் முதல் பரிசாக ரூ.45,000, இரண்டாம் பரிசாக ரூ.30,000, மூன்றாம் பரிசாக ரூ.15,000 என ஆகமொத்தம் ரூ.51.24 இலட்சம் மதிப்பிலான பரிசுத்தொகைகள், பாராட்டுச் சான்றிதழ்கள், பதக்கங்கள் வழங்கப்பட்டுள்ளன. இந்த பரிசுத்தொகைகள் வெற்றி பெற்ற வீரர், வீராங்கனைகளின் வங்கி கணக்கிற்கு நேரடியாக வரவு வைக்கப்படும்.

மாவட்ட அளவிலான விளையாட்டுப் போட்டிகளில் வெற்றி பெற்றவர்கள் மற்றும் குழு விளையாட்டுப் போட்டிகளில் தேர்வு செய்யப்பட்டவர்கள் மொத்தம் 708 வீரர், வீராங்கனைகள் திண்டுக்கல் மாவட்டத்தின் சார்பாக மாநில அளவிலான போட்டிக்கு அரசு செலவில் விளையாட்டுச் சீருடைகள் வழங்கி அழைத்துச் செல்லப்படுவார்கள். மாநில அளவிலான போட்டிகள் 04-10-2024 முதல் 24-10-2024 வரை சென்னை, மதுரை, திருச்சி மற்றும் கோயம்புத்தூர் ஆகிய மையங்களில் நடைபெற உள்ளது.

மாவட்ட அளவிலான போட்டிகளில் வெற்றி பெற்றவர்கள் தொடர்ந்து பயிற்சிகள் மேற்கொண்டு, மாநில அளவிலான போட்டிகளில் பங்கேற்று வெற்றி பெற வேண்டும். அதற்காக தினமும் தொடர்ந்து பயிற்சி மேற்கொள்ள வேண்டும். சத்தான உணவுகள் எடுத்துக்கொள்ள வேண்டும். திண்டுக்கல் மாவட்டம் முழுவதும், உங்கள் வெற்றியை எதிர்நோக்கி காத்திருக்கிறது.

திண்டுக்கல் மாவட்டத்தினைச் சேர்ந்த இளைஞர்கள் மற்றும் பள்ளி, கல்லூரி மாணவ, மாணவிகள் தங்கள் திறனை மேம்படுத்திக் கொண்டு, சர்வதேச மற்றும் தேசிய அளவிலான விளையாட்டுப் போட்டிகளில் பங்கேற்று வெற்றிபெற்று மாவட்டத்திற்கு மதிப்பையும், உங்கள் வாழ்விற்கு வளத்தையும் சேர்க்க வேண்டும், என மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் தெரிவித்தார்.

இந்நிகழ்ச்சியில், மாவட்ட விளையாட்டு மற்றும் இளைஞர் நல அலுவலர் திரு.ஆர்.சிவா, பயிற்சியாளர்கள், விளையாட்டு வீரர் மற்றும் வீராங்கனைகள் உட்பட பலர் கலந்துகொண்டனர்.

செய்தி வெளியீடு:- செய்தி மக்கள் தொடர்பு அலுவலர், திண்டுக்கல்.