Close

Collector – Art and Culture Award

Publish Date : 19/01/2022

செ.வெ.எண்:-37/2022

நாள்: 19.01.2022

திண்டுக்கல் மாவட்டக் கலை மன்றம் வாயிலாக சிறந்த கலைஞர்களுக்கு 2021-2022-ஆம் ஆண்டுக்கான கலை விருதுகள் வழங்கப்படவுள்ளது.
கலை விருது பெற தகுதியுள்ள கலைஞர்கள் விண்ணப்பிக்கலாம் – மாவட்ட ஆட்சித்தலைவர் முனைவர் ச.விசாகன், இ.ஆ.ப., அவர்கள் தகவல்.

தமிழ்நாட்டின் கலைப் பண்புகளை மேம்படுத்தவும், பாதுகாக்கும் நோக்கிலும், கலைஞர்களின் கலைத்திறனை சிறப்பிக்கும் வகையிலும் கலை பண்பாட்டுத்துறையின் கீழ் மாவட்ட ஆட்சித்தலைவர் அவர்கள் தலைமையில் செயல்படும் மாவட்டக் கலை மன்றங்களின் வாயிலாக ஒவ்வொரு மாவட்டத்திலும் 2002-2003-ஆம் ஆண்டு முதல் ஆண்டுதோறும் வயது மற்றும் கலைப்புலமையின் அடிப்படையில் சிறந்த ஐந்து கலைஞர்களுக்கு விருதுகள் வழங்க அரசு ஆணையிடப்பட்டுள்ளது. அவ்வாணையின்படி, திண்டுக்கல் மாவட்டத்தில் 2002-2003-ஆம் ஆண்டு முதல் 2018-2019-ஆம் ஆண்டு வரையில் 85 கலைஞர்களுக்கு கலை விருதுகள் வழங்கி கௌரவிக்கப்பட்டுள்ளது.

2021-2022-ஆம் ஆண்டுக்கான கலை விருதுகள், கலை பண்பாட்டுத்துறையின் கீழ் இயங்கி வரும் திண்டுக்கல் மாவட்டக் கலை மன்றத்தின் வாயிலாக, திண்டுக்கல் மாவட்டத்தில் இயல், இசை, நாடகம் முதலிய கலைகளில் ஒன்று அல்லது ஒன்றுக்கு மேற்பட்ட கலைகளில் சிறந்து விளங்கும் கலைஞர்களுக்கு விருதுகள் வழங்க மாவட்ட ஆட்சித்தலைவர் அவர்கள் தலைமையில் தேர்வாளர் குழு அமைக்கப்படவுள்ளது.

ஆகவே, திண்டுக்கல் மாவட்டத்தைச் சேர்ந்த பாட்டு, பரதநாட்டியம், கும்மி, கோலாட்டம், மயிலாட்டம், தேவராட்டம், தோல்பாவைக்கூத்து, பொம்மலாட்டம், நையாண்டி மேளம், கரகாட்டம், காவடி, பொய்க்கால் குதிரையாட்டம், மரக்கால் ஆட்டம், கோல்கால் ஆட்டம், கழியல் ஆட்டம், கணியான் கூத்து, ஓவியம், சிற்பம், அரசன் அரசியாட்டம், புலியாட்டம், காளையாட்டம், மானாட்டம், பாம்பாட்டம், குறவன் குறத்தியாட்டம், ஆழியாட்டம், கைச்சிலம்பாட்டம், சிலம்பாட்டம்(வீரக்கலை) மற்றும் வில்லிசை முதலிய செவ்வியல் கலைகள் நாட்டுப்புறக் கலைகள் என அனைத்து வகை முத்தமிழ் கலைகளில் சிறந்து விளங்கும் கலைஞர்களிடமிருந்து விண்ணப்பங்கள் வரவேற்கப்படுகின்றன.

கலை விருதுகள் முறையே, 18 வயதும் அதற்குட்பட்ட கலைஞர்களுக்கு கலைஇளமணி, 19 முதல் 35 வயதிற்குட்பட்ட கலைஞர்களுக்கு கலைவளர்மணி, 36 முதல் 50 வயதிற்குட்பட்ட கலைஞர்களுக்கு கலைச்சுடர் மணி, 51 முதல் 65 வயதிற்குட்பட்ட கலைஞர்களுக்கு கலைநன்மணி, 65 வயதிற்கு மேற்பட்ட கலைஞர்களுக்கு கலைமுதுமணி என்ற நிலைகளில் விருதுகள் வழங்கப்படவுள்ளன. வயது மற்றும் கலைப்புலமையின் அடிப்படையில் தேர்ந்தெடுக்கப்படும் ஐந்து சிறந்த கலைஞர்களுக்கு பொற்கிழி பட்டயம் மற்றும் பொன்னாடையும் வழங்கப்படும்.

திண்டுக்கல் மாவட்டத்தில் தேசிய விருதுகள், மாநில விருதுகள் (கலைமாமணி) மற்றும் ஏற்கனவே மாவட்டக் கலை மன்றத்தின் விருதுகளைப் பெற்ற கலைஞர்கள் இவ்விருதிற்கு விண்ணப்பம் செய்யக்கூடாது.

திண்டுக்கல் மாவட்டத்தைச் சேர்ந்த தகுதி வாய்ந்த கலைஞர்கள் விருதுகள் பெறுவதற்கான விண்ணப்பத்துடன் வயதுச் சான்று, முகவரிச்சான்று, அடையாள அட்டை, ஆதார்அட்டை மற்றும் கலை அனுபவச் சான்றுகளின் நகல்களுடன் (தொலைபேசி எண்ணுடன்) “உதவி இயக்குநர், மண்டலக் கலைபண்பாட்டு மையம், பாரதி உலா முதல் தெரு, ரேஸ் கோர்ஸ் காலனி, தல்லாக்குளம் (அ), மதுரை– 625002.” என்ற முகவரிக்கு 18.02.2022-ஆம் தேதிக்குள் விண்ணப்பிக்க வேண்டும். மேலும் விபரங்களுக்கு 0452-2566420 என்ற அலுவலக தொலைப்பேசி எண்ணில் தொடர்புகொண்டு தெரிந்துகொள்ளலாம் என மாவட்ட ஆட்சித்தலைவர் முனைவர் ச.விசாகன், இ.ஆ.ப., அவர்கள் தெரிவித்துள்ளார்கள்.

செய்தி வெளியீடு:- செய்தி மக்கள் தொடர்பு அலுவலர், திண்டுக்கல்.