Close

Monday Grievance Day Petition Meeting (27/12/2021)

Publish Date : 27/12/2021
.

...

செ.வெ.எண்:-67/2021

நாள்:27.12.2021

திண்டுக்கல் மாவட்ட ஆட்சியர் அலுவலகத்தில் மாவட்ட ஆட்சித்தலைவர் முனைவர் ச.விசாகன், இ.ஆ.ப., அவர்கள் தலைமையில் மக்கள் குறைதீர்க்கும் நாள் கூட்டம் நடைபெற்றது.

திண்டுக்கல் மாவட்ட ஆட்சியர் அலுவலகத்தில், மாவட்ட ஆட்சித்தலைவர் முனைவர் ச.விசாகன், இ.ஆ.ப., அவர்கள் தலைமையில், மக்கள் குறைதீர்க்கும் நாள் கூட்டம் இன்று (27.12.2021) நடைபெற்றது. இன்றைய மக்கள் குறைதீர்க்கும் நாள் கூட்டத்தில் பொதுமக்களிடமிருந்து 223 மனுக்கள் பெறப்பட்டன. இந்த மனுக்கள் மீது உரிய நடவடிக்கை மேற்கொள்ள சம்பந்தப்பட்ட துறை அலுவலர்களுக்கு, மாவட்ட ஆட்சித்தலைவர் அவர்கள் உத்தரவிட்டார்கள்.

தமிழக அரசின் உத்தரவின்படி, பொதுமக்களின் குறைகளை களைவதற்காகவும், பொதுமக்களிடமிருந்து கோரிக்கை மனுக்களை பெற்று உரிய விசாரணை மேற்கொண்டு, தகுதியான பயனாளிகளுக்கு அரசின் நலத்திட்ட உதவிகள் வழங்கப்பட்டு வருகிறது. அதனடிப்படையில், வாரந்தோறும் திங்கள் கிழமைகளில் மாவட்ட ஆட்சித்தலைவர் அவர்கள் தலைமையில் மக்கள் குறைதீர்க்கும் நாள் கூட்டம், மாவட்ட ஆட்சியர் அலுவலக வளாகத்தில் கொரோனா வைரஸ் பரவல் தடுப்பு நிலையான வழிகாட்டு நெறிமுறைகளைப் பின்பற்றி நடத்தப்படுகிறது.

இன்றைய தினம் நடைபெற்ற மக்கள் குறைதீர்க்கும் நாள் கூட்டத்தில் பொதுமக்களிடமிருந்து வரப்பெற்ற மனுக்களை மாவட்ட ஆட்சித்தலைவர் அவர்கள் பெற்றுக் கொண்டார்கள். மேலும், பெறப்பட்ட மனுக்களில், தகுதியுடைய மனுக்கள் மீது உடன் நடவடிக்கை மேற்கொள்ள, சம்பந்தப்பட்ட அலுவலர்களுக்கு, மாவட்ட ஆட்சித்தலைவர் முனைவர் ச.விசாகன், இ.ஆ.ப., அவர்கள் அறிவுறுத்தினார்கள்.

மேலும், சென்ற வாரம் 20.12.2021 அன்று மக்கள் குறைதீர்க்கும் நாள் முகாமில் கொடுக்கப்பட்ட மனுவிற்கு இந்த வாரம் 27.12.2021-ல் வேடசந்தூரை சேர்ந்த திருமதி.சுகந்தி என்பவருக்கு சமூகப்பாதுகாப்பு திட்டத்தின்கீழ் முதியோர் உதவித்தொகைக்கான ஆணையும், வெளிநாடு வாழ் தமிழர் நலன் சார்பில் சவூதி அரோபியா நாட்டில் இறந்தவர்களின் 2 வாரிசுதாரர்களுக்கு சட்டப்பூர்வ நிலுவை தொகை மற்றும் பணிநிறைவு பலன்கள் ரூ.22,55,738/- தொகைக்கான காசோலையினையும், மின்வளம் மற்றும் மீனவர் நலத்துறையின் சார்பில் NFDB திட்டத்தில் 40% மானியத்தில் அலங்கார மீன்வளர்ப்பிற்கு புதியதாக பண்ணை அமைத்திட தலா ரூ.24,480/- வீதம் 3 பயனாளிகளுக்கு ரூ.73,440/-ம், பண்ணை புணரமைத்தல் திட்டத்தில் 1 பயனாளிக்கு ரூ.10,800/- வீதம் 10 பயனாளிக்கு ரூ.1,08,000/-ம் 3-ம் கட்ட மானிய தொகையினை மாவட்ட ஆட்சித்தலைவர் அவர்கள் வழங்கினார்கள்.

இக்கூட்டத்தில், கூடுதல் ஆட்சியர் (வளர்ச்சி) திரு.ச.தினேஷ்குமார்,இ.ஆ.ப., அவர்கள், மாவட்ட ஆட்சியரின் நேர்முக உதவியாளர் (பொது) திரு.சி.மாறன், தனித்துணை ஆட்சியர்(சமூக பாதுகாப்புத் திட்டம்) திரு.எல்.ராஜசேகர் உட்பட துறை அலுவலர்கள் பலர் கலந்துகொண்டார்கள்.

செய்தி வெளியீடு:- செய்தி மக்கள் தொடர்பு அலுவலர், திண்டுக்கல்.