குஜிலியம்பாறை வருவாய் வட்டத்தில் “உங்களைத் தேடி, உங்கள் ஊரில்” திட்டத்தின் கீழ் மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் ஆய்வு மேற்கொண்டார்

செ.வெ.எண்:-49/2024

நாள்:-18.09.2024

திண்டுக்கல் மாவட்டம்

குஜிலியம்பாறை வருவாய் வட்டத்தில் “உங்களைத் தேடி, உங்கள் ஊரில்” திட்டத்தின் கீழ் மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் ஆய்வு மேற்கொண்டார்.

திண்டுக்கல் மாவட்டம், குஜிலியம்பாறை வருவாய் வட்டத்தில் “உங்களைத் தேடி, உங்கள் ஊரில்” திட்டத்தின் கீழ், மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் இன்று(18.09.2024) பல்வேறு பகுதிகளில் ஆய்வு மேற்கொண்டு, குஜிலியம்பாறை வருவாய் வட்டாட்சியர் அலுவலகத்தில் துறை அலுவலர்களுடன் ஆய்வு மேற்கொண்டார்.

குஜிலியம்பாறை வட்டத்திற்குட்பட்ட நா.புதுரோடு, நாகையாகோட்டை தொடக்க வேளாண்மை கூட்டுறவு கடன் சங்க நியாய விலைக்கடை, நாகையாகோட்டை தொடக்க வேளாண்மை கூட்டுறவு வங்கியில் செயல்பட்டு வரும் இ-சேவை மையம், கோவிலூரில் தற்காலிக கட்டடித்தில் இயங்கி வரும் அரசு ஆரம்ப சுகாதார நிலையம், கோவிலூரில் அரசு ஆரம்ப சுகாதார நிலையம் கட்டுமான பணிகள், வடுகம்பாடி ஊராட்சி, புளியம்பட்டியில் புதியதாக கட்டப்பட்டுள்ள ஊராட்சி மன்ற அலுவலக கட்டடம், புளியம்பட்டி ஊராட்சியில் கலைஞரின் கனவு இல்லம் கட்டுமான பணிகள், புளியம்பட்டி அரசு ஆரம்ப துணை சுகாதார நிலையம், புளியம்பட்டி கால்நடை மருந்தகம், புளியம்பட்டி கிராம நிர்வாக அலுவலகம், புளியம்பட்டியில் மகாத்மா காந்தி தேசிய ஊரக வேலை ஊறுதியளிப்பு திட்டத்தின் மூலம் தனிநபர் விவசாய நிலங்களில் வரப்பு கட்டும் பணி, வடுகம்பட்டி ஊராட்சி ஒன்றிய துவக்கப்பள்ளி, தளிப்பட்டி ஊராட்சி ஒன்றிய துவக்கப்பள்ளி, வடுகம்பட்டி ஊராட்சியில் மகாத்மா காந்தி தேசிய ஊரக வேலை ஊறுதித்திட்டத்தின்கீழ் மேற்கொள்ளப்பட்டு வரும் பண்ணை குட்டை தூர்வாரும் பணி, சின்னலுப்பை ஊராட்சியில் மகாத்மா காந்தி தேசிய ஊரக வேலை ஊறுதித்திட்டத்தின்கீழ் சி.அம்மாபட்டி, அம்மாகுளம் எரிமேடு அருகே குளம் அமைக்கும் பணி ஆகியவற்றை இன்று(18.09.2024) பார்வையிட்டு ஆய்வு மேற்கொண்டார்.

இந்த ஆய்வின்போது, மாவட்ட ஆட்சித்தலைவர் அவர்கள் தெரிவித்ததாவது:-

மாண்புமிகு தமிழ்நாடு முதலமைச்சர் அவர்கள், தலைமையிலான தமிழ்நாடு அரசு, மக்கள் நலனை முன்னிறுத்தி பல்வேறு திட்டங்களைத் தீட்டி, அவற்றைத் திறம்படச் செயல்படுத்தி வருகிறது. பல்வேறு முன்னோடித் திட்டங்கள் மக்களுக்காகத் தீட்டப்பட்டு அவை அனைத்தும் கடைக்கோடியில் வாழக்கூடிய அனைத்துத்தரப்பு மக்களை சென்றடைவதற்குத் தேவையான நடவடிக்கைகள் எடுக்கப்பட்டு வருகின்றன.

அரசின் அனைத்து நலத்திட்டங்களும், சேவைகளும் தங்குதடையின்றி விரைந்து மக்களைச் சென்றடைவதை உறுதி செய்திட வேண்டுமென்ற உன்னத நோக்கத்தின் அடிப்படையில் மக்களை நாடி, மக்கள் குறைகளைக் கேட்டு, உடனுக்குடன் தீர்வு காண அரசு இயந்திரம் களத்திற்கே வரும் “உங்களைத் தேடி உங்கள் ஊரில்“ என்ற புதிய திட்டத்தை மாண்புமிகு தமிழ்நாடு முதலமைச்சர் அவர்கள் 23.11.2023 அன்று அறிவித்தார்கள்.

திண்டுக்கல் மாவட்டத்தில் இத்திட்டமானது தொடர்ந்து செயல்படுத்தப்பட்டு வருகிறது. அதன்படி இன்று(18.09.2024) குஜிலியம்பாறை வட்டத்தில் ஆய்வு மேற்கொள்ளப்பட்டது.

குஜிலியம்பாறை வட்டம், வடுகம்பாடி ஊராட்சியில் கலைஞரின் கனவு இல்லம் திட்டத்தின் கீழ், புளியம்பட்டி, எஸ்.களத்துார், அரண்மனையூர் ஆகிய கிராமங்களில் நடைபெற்று வரும் வீடுகள் கட்டுமான பணிகள், மகாத்மாகாந்தி தேசிய ஊரக வேலைவாய்ப்பு உறுதித் திட்டத்தின் கீழ், புளியம்பட்டியில் ரூ.28.01 இலட்சம் மதிப்பீட்டில் கட்டப்பட்டுள்ள ஊராட்சி மன்ற அலுவலகம், ரூ. 2.00 இலட்சம் மதிப்பீட்டில் மேற்கொள்ளப்பட்டு வரும் தனிநபர் விவசாய நிலங்களில் வரப்பு கட்டும் பணி, ரூ.2.00 இலட்சம் மதிப்பீட்டில் பண்ணை குட்டை தூர்வாரும் பணிகள், சின்னலுப்பை ஊராட்சி சி.அம்மாபட்டி கிராமத்தில் ரூ.11.22 இலட்சம் மதிப்பீட்டில் புதிய பண்ணை குட்டை அமைக்கும் பணிகள், தளிப்பட்டி ஊராட்சி ஒன்றிய துவக்கப்பள்ளியில் ரூ.32.8 இலட்சம் மதிப்பீட்டில் மேற்கொள்ளப்பட்டு வரும் கூடுதல் வகுப்பறை கட்டடம் கட்டுமான பணிகள், ஆகிய இடங்களில் நேரில் பார்வையிட்டு ஆய்வு மேற்கொள்ளப்பட்டது.

மேலும், வருவாய்த்துறை, காவல்துறை, ஊரக வளர்ச்சித்துறை, பேரூராட்சிகள் துறை, வேளாண்மைத்துறை, கால்நடை பராமரிப்புத்துறை, கல்வித்துறை, மருத்துவத்துறை, கூட்டுறவுத்துறை, இந்து சமய அறநிலையத்துறை, வணிகவரித்துறை, தொழிலாளர் நல வாரியம், மீன்வளத்துறை, வீட்டு வசதி வாரியம், மாற்றுத்திறனாளிகள் நலத்துறை, நெடுஞ்சாலைத்துறை, வேலைவாய்ப்புத் துறை, விளையாட்டுத்துறை, பால்வளத்துறை, பதிவுத்துறை, உணவுப்பொருள் வழங்கல் மற்றும் நுகர்வோர் பாதுகாப்புத்துறை, சமூக நலத்துறை, வேளாண்மை பொறியியல் துறை, குடிநீர் வடிகால் வாரியம், மாவட்ட தொழில் மையம், தாட்கோ, வங்கித்துறை, போக்குவரத்துத்துறை, மின்சார வாரியம், பட்டுவளர்ச்சித்துறை, தமிழ்நாடு நுகர்பொருள் வாணிபக்கழகம், வனத்துறை, தீயணைப்புத்துறை, வேளாண் வணிகம், குழந்தைகள் பாதுகாப்புத்துறை, உள்ளூர் திட்டங்குழுமம், பொதுப்பணித்துறை, புவியியல் மற்றும் சுரங்கத்துறை, மாசுக்கட்டுப்பாட்டு வாரியம், கலால் துறை, நில அளவைத்துறை, முன்னாள் படைவீரர் நலத்துறை ஆகிய துறைகள் சார்பில் துறை அலுவலர்களால் பல்வேறு இடங்களில் ஆய்வு மேற்கொள்ளப்பட்டது.

பொதுமக்களுக்குத் தேவையான குடிநீர், சாலை வசதி, தெருவிளக்கு, கழிப்பறை உள்ளிட்ட அடிப்படை வசதிகள் தொடர்பாக நிறைவேற்றப்பட்டுள்ள பணிகள் குறித்தும், கிராம நிர்வாக அலுவலகம் மூலமாக வழங்கப்படும் சான்றிதழ்கள் உடனுக்குடன் காலதாமதமின்றி வழங்கப்படுகிறதா என்பது குறித்தும் ஆய்வு மேற்கொள்ளப்பட்டது.

நியாயவிலைக் கடைகளில் குடும்ப அட்டைகளின் எண்ணிக்கை, பொருட்களின் இருப்பு மற்றும் பொருட்களின் தரம் குறித்து ஆய்வு மேற்கொள்ளப்பட்டது. இங்குள்ள அரசு ஆரம்ப சுகாதார நிலையத்தில் சிகிச்சை பெறும் நோயாளிகளின் எண்ணிக்கை, நோயாளிகளுக்கு அளிக்கப்படும் சிகிச்சை முறைகள், மருத்துவர்கள், மருத்துவப் பணியாளர்கள், மருந்துகள் இருப்பு, சுகாதாரம் குறித்து ஆய்வு மேற்கொள்ளப்பட்டது.

விவசாய மேம்பாட்டிற்காக தமிழக அரசு செயல்படுத்தும் திட்டங்கள், விவசாயிகளுக்கு வழங்கப்படும் மானியத் திட்டங்கள் அனைத்தும் தகுதியான விவசாயிகளுக்கு சென்றடைகிறதா என்பது குறித்தும், விவசாயிகளுக்கு வழங்கப்பட்டுள்ள திட்டங்கள், பயனடைந்த விவசாயிகள் விபரம் குறித்தும் ஆய்வு மேற்கொள்ளப்பட்டது.

கால்நடை மருந்தகத்தில் சிகிச்சை பெறும் கால்நடைகளின் எண்ணிக்கை, பயன்பெறும் விவசாயிகள் எண்ணிக்கை, கால்நடைகளுக்கு செலுத்தப்படும் தடுப்பூசிகள் குறித்து ஆய்வு மேற்கொள்ளப்பட்டது.

பள்ளிகளில் மாணவர் சேர்க்கை, உட்கட்டமைப்பு வசதிகள், காலை சிற்றுண்டி திட்டம், மதிய உணவு திட்டங்களில் செயல்பாடுகள், அதன்மூலம் பயன்பெறும் மாணவ, மாணவிகள் குறித்தும், தரமான உணவுகள் வழங்கப்படுகிறதா என்பது குறித்தும் ஆய்வு மேற்கொள்ளப்பட்டது.

”உங்களைத்தேடி உங்கள் ஊரில்” திட்டம் என்பது பல்வேறு சேவைகளை வழங்குவதை மேம்படுத்தவும், அரசின் பல்வேறு திட்டங்கள் மற்றும் திட்டப்பணிகளை விரைவாக செயல்படுத்தும் திட்டமாகும். இத்திட்டத்தில் மாவட்ட ஆட்சித்தலைவர் மற்றும் மாவட்ட அளவிலான அலுவலர்கள் ஒவ்வொரு மாதமும் ஒரு நாள் வட்ட அளவில் தங்கி, கள ஆய்வில் ஈடுபட்டு பொதுமக்களை நேரடியாக சந்தித்து அவர்களின் குறைகளைக் கேட்டறிந்தும், அரசின் நலத்திட்டங்களும், சேவைகளும் மக்களுக்கு தடையின்றி சென்றடைவதை உறுதி செய்யும் ஒரு திட்டமாகும். அரசின் திட்டங்களை பொதுமக்களிடம் கொண்டு சேர்ப்பது அரசு அலுவலர்களின் பொறுப்பாகும். எனவே, அரசின் திட்டங்கள் பொதுமக்களுக்கு சென்றடையும் வகையில் அனைத்து அரசு அலுவலர்களும் ஒருங்கிணைந்து செயலாற்றிட வேண்டும், என மாவட்ட ஆட்சித்தலைவர் திருமதி மொ.நா.பூங்கொடி, இ.ஆ.ப., அவர்கள் தெரிவித்தார்.

தொடர்ந்து, குஜிலியம்பாறை வருவாய் வட்டாட்சியர் அலுவலகத்தில், அனைத்துத்துறை அலுவலர்களுடன் மாவட்ட ஆட்சித்தலைவர் அவர்கள் ஆலோசனை மேற்கொண்டு, அலுவலர்களின் ஆய்வு அறிக்கையை பார்வையிட்டார். தொடர்ந்து மேற்கொள்ள வேண்டிய பணிகள் தொடர்பாக சம்பந்தப்பட்ட துறை அலுவலர்களுக்கு அறிவுறுத்தி, பணிகளை நிறைவேற்றி அதுதொடர்பான அறிக்கையை சமர்ப்பிக்க அறிவுறுத்தினார்.

இந்த ஆய்வின்போது, மாவட்ட வருவாய் அலுவலர் திரு.சே.ஹா.சேக் முகையதீன், மாவட்ட ஊரக வளர்ச்சி முகமை திட்ட இயக்குர் திருமதி பெ.திலகவதி, பழனி வருவாய் கோட்டாட்சியர் திரு.எஸ்.கிசான்குமார், இ.ஆ.ப., அவர்கள், தமிழ்நாடு மாநில ஊரக வாழ்வாதார இயக்கம் திட்ட இயக்குநர் திரு.சதீஸ்பாபு, கூட்டுறவு சங்கங்கள் இணைப் பதிவாளர் திரு.கோ.காந்திநாதன், தனித்துணை ஆட்சியர்(சமூக பாதுகாப்புத் திட்டம்) திருமதி கங்காதேவி உட்பட துறை அலுவலர்கள் பலர் உடனிருந்தனர்.

செய்தி வெளியீடு:- செய்தி மக்கள் தொடர்பு அலுவலர், திண்டுக்கல்.